ඔබ ඔබේ අසාත්මිකතාවයන් ගැන දන්නවා ද?

මේ ලිපිය වැදගත් වේ යයි සිතන මිතුරු/මිතුරියන් අතර share කරන්න පහත icon ක්ලික් කරන්න

විවිධ රෝගවල ලක්ෂණ ලෙස ගැනෙන සමහර දේවල් ඇත්තෙන්ම විෂබීජයක් නිසා ඇති වන්නක් නොව අපගේ ශරීරය බාහිර පාරිසරික තත්ත්වයන් හමුවේ දක්වන ප්‍රතික්‍රියාවක් බව අප සමහර විට දන්නේ නැහැ… මෙසේ ඇතිවන අසාත්මික තත්ත්වයන් ඇතැම් විට ජීවිතයට තර්ජන කරන මට්ටමටත් වැඩි වෙන්න පුළුවන්!

* අසාත්මිකතාව (Allergy) යනු…

අසාත්මිකතාව (Allergy) යනු සාමාන්‍යයෙන් කිසිවෙකුට හානි දායක නොවෙන පරිසරයේ ඇති යම් යම් සංයෝග හා ද්‍රව්‍ය ශරීරගත වූ විට ඒවාට එරෙහි ව ශරීරය ප්‍රතික්‍රියා කිරීමයි. උදාහරණයක් ලෙස මල් වල පරාග දැක්විය හැකියි. මල් පිපෙන කාලයට මල් වල පරාග සුලඟත් සමඟ වාතයට මුසු වෙනවා. මේ පරාග අඩංගු වාතය ආශ්වාස කලොත් සාමාන්‍යයෙන් අපේ ශ්වසන පද්ධතියෙන් ඒ පරාග පෙරී ඉවත් කෙරෙනවා. කිසිදු ප්‍රතික්‍රියාවක් පෙන්වන්නේ නැහැ. ඒත් සමහර අයගේ ශ්වසන පද්ධතියට මේ පරාග ඇතුලු වුනා ම ඒවා හානි දායක අංශු ලෙස හඳුනාගෙන ඊට එරෙහිව ප්‍රතික්‍රියා කරනවා. එවිට කිවිසුම් යාම, නාසය හිරවීම, හුස්ම ගැනීම අපහසු වීම, ඇඟ කැසීම, ඇඟේ රතු දදයක් මතු වීම වැනි රෝග ලක්ෂණ ඇති වෙනවා. සමහර අය අසාත්මිකතාව නිසා මරණාසන්න ලෙස රෝගී විය හැකියි. ඒ නිසා ඔබ ඔබේත් ඔබේ ආදරණීයයන්ගේත් අසාත්මිකතාවන් ගැන දැන ගෙන සිටිය යුතුයි.

* අසාත්මිකතාවයේ දී කුමක්ද වෙන්නේ?

අසාත්මිකතාවයේ දී ශරීරයේ සිදුවන ක්‍රියා දාමය කෙටියෙන් සලකා බලමු. විවිධ සංයොග අපේ ශරීරයට අයත් ද, පිටතින් ඇතුලු වූ ඒවා ද යන්න හඳුනාගත හැකි Immunoglobulin නම් ප්‍රෝටීන වර්ගයක් අපේ ශරීරයේ තිබෙනවා. විශේෂයෙන් අසාත්මිකතාවයන්ට අවදානම් සහිත අයගේ ශරීරයේ Immunoglobulin E වැඩිපුර තිබෙනවා. මේවා පිටතින් එන පරාග, දූවිලි හෝ විවිධ රසායනයන් සමඟ බැඳී අපේ ශරීරයේ ඇති Mast cells උත්තේජනය කර Histamin නම් රසායනය නිදහස් කරනවා. මේ Histamin නිසා mast cells අවට ප්‍රදේශයේ රුධිර වාහිනී විස්තාරණය වෙනවා. රුධිර වාහිනීවල බිත්ති හරහා පටක තුලට ජලය කාන්දු වෙනවා. ඒ ප්‍රදේශය ඉදිමෙනවා. දදයක් හට ගන්නවා. මේ නිසා එම ප්‍රදේශයේ උණුසුම අන් තැන්වලට වඩා වැඩිවෙනවා. ඉදිමීමත් විවිධ රසායනික සංයෝග මඟින් ස්නායු උත්තේජනය වීමත් නිසා වේදනාවක්, කැසීමක් ඇති වෙනවා. අසාත්මිකතාවයක දී සම රතුවී කැසීම සිදු වන්නේ එසේ යි.

* කලින් හඳුනා ගැනීමට පුළුවන්ද?

Anaphylaxis වැනි ප්‍රතික්‍රියාවක් ඇති විටක අසාත්මික ද්‍රව්‍යය කුමක්දැයි හඳුනා ගැනීමට Skin test කල හැකියි. ඔබට අසාත්මික දැයි සැක සිතන ද්‍රව්‍ය වලින් සාම්පල කිහිපයක් සම මත තැන්පත් කර එයට දක්වන ප්‍රතිචාරයන් පිරික්සීමෙන් අසාත්මිකතාව ගැන අදහසක් ලබා ගත හැකියි.

* ජීවිතයට තර්ජනයක් වන අවස්ථා

අසාත්මිකතාවය නිසා සුළු රතු වීමක සිට Anaphylaxis නම් මරණීය තත්වය දක්වා ඇති විය හැකියි.  ඉහත පැහැදිලි කල ක්‍රියාදාමය විශාල පරිමාණයෙන් සිරුර පුරාම සිදු වීමෙන් Anaphylaxis තත්වය ඇති වෙනවා. Anaphylaxis වල දී මුලු ශරීරයේ ම රුධිර නාල වලින් පටක තුලට ජලය කාන්දු වීමෙන් රුධිර පරිමාව අඩු වීම නිසාත් රුධිර නාල විස්තාරණය වීම නිසාත් රුධිර පීඩනය අඩු වෙනවා. මොලය, හෘදය හා වකුගඩු වලට රුධිර සැපයීම අඩු වෙනවා. ඉතා ඉක්මනින් රෝහල් ගත කර ප්‍රතිකාර නොකලොත් ජීවිතයට තර්ජනයක් විය හැකියි.

* වැළකෙන ක්‍රම

අසාත්මිකතාවයක් ඇත්නම් එය හොඳින් හඳුනා ගෙන එම අසාත්මිකතාවය දක්වන ද්‍රව්‍යය ශරීරගත වීමට ඉඩ නොදීම මේ අසාත්මිකතාවයට හොඳ ම ප්‍රතිකාරයයි. සමහර විට එයින් වැලකීම ඉතා අපහසුයි. පරාග, දූවිලි වැනි පරිසරයේ නිතරම අධික ප්‍රමාණයන්ගෙන් පවතින දේවල් වලට Anaphylaxis වැනි දරුණු අසාත්මිකතාවක් ඇත් නම් නිතර බෙහෙත් වර්ග ලඟ තබා ගත යුතුයි. ලඟ තබා ගැනීමට සාදන ලද කුඩා කාඩ් පතක අසාත්මිකතාවන් ගැන සටහන් කිරීම සමහර රට වල සිදු වෙනවා. ඔබට හෝ ඔබේ ආදරණීයයන්ට මෙවන් තත්වයක් ඇත්නම් ඒ ගැන දැන සිටීම ජීවිතයක් රැකීමට හේතු විය හැකියි.

Dr. T. M. S. Sameera B. Madugalle M.B.,B.S (COL).

මේ ලිපිය වැදගත් වේ යයි සිතන මිතුරු/මිතුරියන් අතර share කරන්න පහත icon ක්ලික් කරන්න

මෙම වෙබ් අඩවිය භාවිතා කිරීමෙදී අදාල කොන්දේසි සහ වෙබ් අඩවිය අදාලව වගකීම් ප්‍රතික්ෂේප කිරීම

මෙම වෙබ් අඩවියේ සඳහන් කරුණු ඔබව දැනුවත් කිරීම සඳහා පමණක් වන අතර, මෙම කරුණු පදනම් කරගෙන ඔබ විසින් යම් කිසි ප්‍රථිකාර ආදිය නොකළ යුතුය. ප්‍රථිකාර/ අහාර පාන ගැනීම/ ව්‍යායාම/ හැසිරීම් ආදී සියල්ල අදාළ ක්ෂේත්‍රයේ විශේෂඥ දැනුමක් ඇති වෛද්‍ය උපදෙස් පැතීමෙන් පසු පමණක් සිදු කරන්න.

අප ආයතනය සහ පාඨක ඔබ අතර වගකීම් ප්‍රතික්ෂේපනය කෙරෙන පිටුව පහත සබැඳියෙන් (URL/link) කියවිය හැක.

 

mathru.lk

mathru.lk

Inline
අළුත් ලිපි ගැන දැන ගැනීම සඳහා පහත ඇති "Like Page" ක්ලික් කරන්න. ස්තුතියි!
Inline
අළුත් ලිපි ගැන දැන ගැනීම සඳහා පහත ඇති "Like Page" ක්ලික් කරන්න. ස්තුතියි!